Դիլիջանի համայնքային կենտրոնի «MADE» ծրագիրը արվեստի և արհեստների հարթակ է բոլոր նրանց համար, ովքեր ներկայացնում են համայնքի ստեղծագործական կյանքը և պատրաստ են կիսվելու իրենց փորձով, գիտելիքներով և հմտություններով։ MADE-ը 2022 թվականից հանդես է գալիս նոր ձևաչափով՝ առաջարկելով կավագործություն, ատաղձագործություն, տեքստիլ և զարդագործություն: Այն հանդիսանում է նոր հնարավորություն տեղի վարպետների և համայնքում բնակվող կամ ժամանակավոր բնակություն հաստատած արվեստասերների համար, ովքեր փնտրում են ինքնարտահայտման հարթակ, ցանկանում են ստեղծագործել, արարել, սովորել նոր հմտություններ և ձեռք բերել նոր ընկերներ ու կապեր։ MADE-ի նպատակն է նպաստել տարածաշրջանում մշակութային կյանքի ակտիվացմանը և բարձրացնել Դիլիջանի ճանաչելիությունը՝ դեկորատիվ-կիրառական արվեստի միջոցով։ Հարթակը նաև պարբերաբար կազմակերպում է վարպետաց դասեր տարիքային բոլոր խմբերի համար՝ ստեղծելով բացառիկ նմուշներ, որոնք ներկայացնում են Դիլիջանին բնորոշ ոճային առանձնահատկությունները՝ առաջարկելով յուրօրինակ ոճային լուծումներ։
